إزاي تسجل في امتحان FE من مصر أو الخليج: خطوة بخطوة

Oct 8

2 min read

كتير من المهندسين بيأجلوا امتحان FE لأنهم فاكرين إن التسجيل من برة أمريكا معقد. الحقيقة إن الخطوات واضحة، والامتحان نفسه متاح في مراكز Pearson VUE في مصر ودول الخليج طول السنة.

قبل ما تبدأ: جهّز الحاجات دي

جواز سفر ساري، والاسم عليه هو نفس الاسم اللي هتسجل بيه بالظبط.
إيميل شغال بتتابعه.
بطاقة دفع دولية لدفع الرسوم.
شهادة التخرج أو إفادة إنك في السنة النهائية، لو الجهة اللي هتختارها طلبتها.

الخطوة 1: افتح حساب MyNCEES

ادخل موقع NCEES واعمل حساب جديد. اكتب اسمك بالإنجليزي زي ما هو في الباسبور بالظبط، لأن أي اختلاف ممكن يمنعك من دخول الامتحان يوم الاختبار.

الخطوة 2: اختار الامتحان والتخصص

من الحساب اختار FE، وبعدين التخصص: Civil أو Mechanical أو Electrical and Computer أو Other Disciplines أو غيرهم. لو محتار، اقرا مقالنا عن اختيار تخصص FE، أو ابعتلنا شهادتك على واتساب وهننصحك.

الخطوة 3: اختار الجهة اللي هتسجل تبعها

أثناء التسجيل هيطلب منك تختار جهة ترخيص (licensing board). الجهات بتختلف في شروطها، وبعضها ليه متطلبات على الشهادة الجامعية أو على السنة النهائية. ولو أنت في السعودية، اختار الهيئة السعودية للمهندسين كبورد. بعد ما تدفع لـ NCEES، هتقدم طلب عند الهيئة وتدفع رسومها (1500 ريال + ضريبة القيمة المضافة 15%، يعني 1725 ريال)، والهيئة بتبعت موافقتها قبل الحجز. الخطوات بالتفصيل لكل بورد هتلاقيها في مقالات التسجيل عن طريق نقابة المهندسين المصرية، والجامعة الأمريكية بالقاهرة، والهيئة السعودية، وجامعة تكساس بقطر، والجامعة الأمريكية بالشارقة على مدونة GEC.

الخطوة 4: ادفع الرسوم

رسوم الامتحان بتتدفع لـ NCEES مباشرة: 225 دولار لو هتمتحن داخل أمريكا، و250 دولار لو هتمتحن في مركز Pearson VUE برّه أمريكا، وده حال معظم المتقدمين من مصر والخليج. ولو بتقدم عن طريق الهيئة السعودية للمهندسين، فيه كمان رسوم الهيئة (1500 ريال + ضريبة القيمة المضافة 15%، يعني 1725 ريال) بتدفعها ليها بعد رسوم NCEES. وبعض جهات الترخيص التانية ليها رسوم إضافية خاصة بيها.

الخطوة 5: احجز موعدك في Pearson VUE

بعد الموافقة هتقدر تحجز من خلال Pearson VUE وتختار المركز والتاريخ والساعة اللي يناسبوك. في مصر والإمارات والسعودية فيه مراكز معتمدة، والمواعيد متاحة طول السنة، لكن الأماكن بتخلص بسرعة في بعض الشهور، فاحجز بدري.